نهى محمود تكتب : الستات مجانين
رئيس مجلس الادارةاسراء البواردى
رئيس التحريرسعد عبد الغفار

نهى محمود تكتب : الستات مجانين

نهى محمود تكتب : الستات مجانين

نهى محمود

 

أيوة إنت قرأت صح الستات مجانين بس ببساطة من غير جنانهم مش هتعرف تعيش بتكون بتحبك وبتكرهك ومتغاظة منك في نفس الوقت، تفتكر من فراغ؟ لكل فعل رد فعل بتفرق في التوازن هي بتحبك ليه؟ بتكرهك ليه؟ بتتغاظ منك ليه؟ مهم أوي نفهم إننا بنتكلم عن المرأة السوية يعني متجبليش شواذ القاعدة.

 

طيب نرجع تاني للجنان لو إنت جاي من بره تعبان ومش طايق نفسك هتلاقيها بتطبطب مرة واتنين وعشرة طيب تعالى إنت مرة من بره ولقيتها بتعيط، مكشرة، تعبانة يمكن تطبطب مرة وتسأل مرة التالتة إنت هتتنرفذ إلا من رحم ربي، ده الفرق بين الراجل والست الراجل بينسى الست لأ إنت ممكن تكون في حتة تانية خالص وشايل هموم الدنيا وهي عايزة تتكلم معاك وتفضفض وتحكيلك عن يومها وبتفكر في ردَّك اللي حرق دمها.

 

 

في اختلاف كبير بين طبيعة الراجل والست التوازن بيجي من راجل فاهم متفهم وست ذكية، توليفة لو وُجدت هتنجح الحياة، بقينا في مجتمع كثير الزواج كثير الطلاق قليل التفاهم الناس بتتجوز لكل الأسباب الغلط وبيكملوا لكل الأسباب الغلط بس مكملين شابوه والله وحاجة ممتازة، بس تلاقي كثرة الخيانات الزوجية وبلاش نفهم الكلام غلط إحساسك بزميلتك في الشغل أو إعجابك بطنط سوسو جارتك أو بنت طنط سوسو إنت شوفتها فبيتها يمكن مراتك اللي معاك ملكة بالنسبة ليها وجوز طنط سوسو نفسه يولع فيها.

 

 

طيب وبالنسبة ليكِ زميلك اللي في الشغل وإنت بتحكيله وألا حتى بتحكي لصاحبتك وهي بتحكي على جوزها كل ده غلط ومش صح أسرار البيوت مينفعش تطلع بره جدران البيوت “استقيموا يرحمكم الله”، الحياة مش سباق الحياة مودة ورحمة نعيشها صح لإن اللي جاي المهم، إنت ليك دورك وهي ليها دورها، قبل ماتنام اسأل نفسك أنا زوج كويس؟ أب كويس؟ أخ كويس؟ عم كويس؟ وهكذا وصلح من نفسك، كلنا مقصرون المهم الوقت مبيعديش إننا نصلح لحد مانموت، وإنتِ إسألي نفسك أنا زوجة كويسة؟ مش من وجهة نظر نفسك كلنا شايفين نفسنا أيدين صوابعنا العشرة شمع محدش بيشوف نفسه غلط، أنا أم كويسة؟ أخت كويسة؟ بنت كويسة؟

 

 

طيب لو في أخطاء لو الناس بتقولي إنتِ غلط وأقصد بالناس المهمة ليا مش أي حد اللي يحبلك الخير وكلنا بنبقى عارفينهم، صلح نفسك، صلحي نفسك، اقعدوا مع بعض راجعوا نفسكم اتفقوا على قواعد للحياة عشان نكمل عشان ننجح نحط كده نية بينا وبين ربنا إننا هنكون كويسين عشان البيت اللي اتسببنا في وجوده والعيال اللي جبناها أو هنجيبها وفيوم هيسألونا إنتوا اتجوزتوا ليه؟ وفضلتوا مع بعض ليه؟ ياريتكم سيبتوا بعض وهنكون ربينا جيل فاشل لإننا فشلنا نعلمهم الحب والصح من الغلط عيشوا فسلام الناس بتموت في لحظة متجبرش نفسك على حياة، شغل، ناس، عيش صح هي حياة واحدة هتعيشها وهتحاسب عليها والأكبر والأعم هتتحاسب أدام ربنا لما تقابله هتقوله أيه؟ لو لقيت جواب هتكون نجحت في الامتحان

شارك برأيك وأضف تعليق

جميع الحقوق محفوظة لموقع عرب نيوز 2022 ©